الصفحات

7/19/2014

اللغه الهيروغليفيه


ببساااطة
قصة لغة حيرت العالم !!

ببساطة كده و بوضوح ... تخيل نفسك بتتكلم عربي بس للأسف مابتعرفش تكتب ولا تقرا .. و فيه رسالة مهمة جدا عايز تبعتها .. يعني مثلا عايز تقول البيت فيه فار .. هاتكتبه ازاي ده ؟؟ هاتستخدم رسومات
.. هاتروح راسم بيت و فار جوه البيت .. مثلا يعني ..بس بالنسبة للمصريين القدماء الموضوع كان اصعب شوية .. هم برضه استخدموا رسومات علشان ببساطة ماكانش عندهم حاجة اسمها ابجدية .. بس ماستخدموهاش علشان تدي نفس المعني .. يعني لو لاقيت رسمة بيت و رسمة وزة و رسمة تعبان .. ده مش معناه ان التعبان بياكل الوزة جوه البيت .. ببساطة كل رمز او كل رسمة من الرسومات دي بتعبر عن حرف منطوق .. يعني التعبان مثلا يبقي حرف ف .. النسر مثلا يبقي أ و هكذا .. بس برضه الموضوع كان اصعب شوية و معقد ..

ساعات استخدموا رمز واحد او رسمة واحدة بس الرسمة دي تعبر عن حرفين منطوقين .. يعني البيت مثلا بيبقي بر .. و ساعات استخدموا رمز واحد يتنطق 3 حروف .. زي عنخ .. ساعات كانوا يحطوا الرمز بتاع عنخ ده و يحطوا جنبه 3 رسومات ال ع و النون و الخ .. و ساعات من غير .. المهم احنا كده استفدنا اننا نعرف ان فيه رموز بتتنطق حرف واحد و رموز تتنطق حرفين و رموز تتنطق 3 حروف .. ادي اول حاجة .. اللغة المصرية القديمة بقي ليها 4 طرق للكتابة .. اول طريقة الهيروغليفية .. اللي هي الكتابة المقدسة .. و دي بتلاقي الرموز مرسومة بعناية و فيها كل التفاصيل .. يعني مثلا لو لاقيت النسر كامل عنده منقار و ريش و جناحات يبقي ده هيروغليفي, او الكتابة المقدسة و دي كانت بتتنقش علي الحجر في الأماكن المقدسة زي معبد او مقبرة .. ده الخط الرسمي او طريقة الكتابة الرسمية اللي بتتنقش علي الحجر ..

بس تخيل نفسك كاهن او رجل اعمال و بتعمل بزنس و عايز تبعت جواب لشركة مثلا او عايز تشتري قمح .. مش معقول تكتب الرسالة بتاعتك و الرموز تبقي فيها كل التفاصيل .. يعني مافيش وقت بقي تحط النسر بالمنقار و الأجنحة و الريش .. علشان الصفقة ماتروحش منك .. و كمان علشان بترسم دلوقتي علي ورق بردي و بتستخدم حبر و الحبر مش هايساعدك انك ترسم بدقة .. يبقي لازم تستغني عن شوية تفاصيل .. يعني مثلا هاتشيل الجناحات و المنقار و الرجلين .. و ظهرت طريقة كتابة تانية اللي هي الهيراطيقي .. او كتابة الكهنة ..

طيب لو مثلا عايز تبعت جواب حب لخطيبتك .. مش هاتفضل بقي ترسملها نسر بمنقار و تفضل تكتب اسبوع في الجواب ده .. ممكن علي ما تكتب الجواب و يوصلها تكون اتجوزت .. فلازم تكتب اسرع شوية .. هاتضطر تشيل تفاصيل تانية من النسر .. هاتشيل رجليه و بطنه و مش هايفضل حاجة من النسر المسكين ده غير خط كده كان زمان في الأصل نسر .. بس مكتوب بسرعة جدا .. و دي تالت طريقة للكتابة ايام المصريين القدماء .. اسمها ديموطيقي .. و دي كتابة الشعب .. الكتابة العامية يعني

بعد كده بقي اليونانيين وصلوا مصر .. و قالولهم و ليه وجع القلب ده ليه كل الرسومات و الاشكال دي كلها .. احنا هانعلموكوا كام حرف او كام شكل كده تفتكروه و هو ده اللي اسمه الأبجدية اليونانية.. المصريين بقي يكتبوا لغتهم اللي هم بيتكلموها بس بحروف يونانية و علشان كان فيه حروف مصرية مالهاش نطق في الأبجدية اليونانية حطوا كام شكل كده من الديموطيقي علي الأبجدية اليونانية و دي بقي آخر اشكال الكتابة المصرية القديمة و اسمها القبطي .. و بعد كده تدريجيا المصريين بقوا بيتكلموا يوناني و نسوا القبطي ..

و مع مرور الوقت نسيوا اليوناني لما العرب وصلوا مصر و بقت اللغة الرسمية اللغة العربية .. الحظ الحلو بقي ان اللغة القبطية مامتتش .. علشان ببساطة لما المسيحية دخلت مصر كانوا المسيحيين الأوائل بيصلوا بالقبطي .. اللي هي اللغة المصرية القديمة و استمرت لحد دلوقتي في الكنايس اللي بتسمعها في القداس مثلا في عيد الميلاد المجيد .. بس محدش كان عارف ان القبطي هو هو اللغة المصرية القديمة .. علشان كده لما اكتشفوا حجر رشيد اللي كان مكتوب بتلات كتابات .. واحدة منهم يوناني و واحدة هيروغليفي و واحدة ديموطيقي .. شامبليون اضطر انه يدرس قبطي في الكنايس المصرية و اكتشف ان اللغة القطبية هي هي اللغة المصرية القديمة .. بس مكتوبة بالأبجدية اليونانية ..
 
مع تحيات:
 
 
Related Posts Plugin for WordPress, Blogger...

Browse through the application to Android devices and Apple phone's

;